रेल्वे प्रवाशांसाठी मोठा निर्णय: आता ट्रेन सुटण्याच्या ८ तास आधी पहिला आरक्षण चार्ट होणार प्रसिद्ध
मुंबई, १० जुलै २०२५: प्रवाशांचा प्रवास अधिक नियोजित आणि सोयीचा व्हावा, यासाठी रेल्वे प्रशासनाने आरक्षण चार्ट तयार करण्याच्या वेळेत महत्त्वपूर्ण बदल करण्याचा निर्णय घेतला आहे. रेल्वे बोर्डाच्या नव्या आदेशानुसार, १० जुलै २०२५ पासून मेल व एक्सप्रेस गाड्यांचा पहिला आरक्षण चार्ट ट्रेन सुटण्याच्या ८ तास आधी प्रसिद्ध केला जाईल, यापूर्वी ही वेळ ४ तास होती.
नवीन वेळापत्रकानुसार चार्टिंग व्यवस्था:
-
सकाळी ५.०० ते दुपारी २.०० दरम्यान सुटणाऱ्या गाड्यांसाठी मागील रात्री ९.०० वाजता पहिली आरक्षण यादी प्रसिद्ध होईल.
-
दुपारी २.०० नंतर ते पहाटे ५.०० पर्यंत सुटणाऱ्या गाड्यांचा पहिला आरक्षण चार्ट ट्रेन सुटण्याच्या ८ तास आधी तयार केला जाईल.
-
दुसरा व अंतिम आरक्षण चार्ट सध्याप्रमाणेच ट्रेन सुटण्याच्या ३० मिनिटे आधी तयार केला जाईल.
प्रवाशांसाठी फायदेशीर बदल:
या बदलामुळे प्रवाशांना त्यांचा बर्थ, कोच व प्रवासाशी संबंधित इतर माहिती पूर्वीच मिळणार असल्याने, शेवटच्या क्षणी होणारा गोंधळ आणि गर्दी टाळता येणार आहे. तसेच, रिक्त बर्थ असतील तर प्रवासी अंतिम चार्ट होईपर्यंत आरक्षण घेऊ शकणार आहेत.
रेल्वे प्रशासनाने स्पष्ट केले आहे की हा निर्णय प्रवासी सेवा अधिक सुसज्ज, सोयीची व कार्यक्षम करण्यासाठी घेतला गेला आहे. यामुळे प्रवासी, रेल्वे कर्मचारी आणि तिकीट तपासनीस यांच्यासाठीही व्यवस्थापन सुलभ होईल.
रेल्वे प्रशासनाचा उद्देश:
हा बदल रेल्वेच्या यात्रेपूर्व नियोजनात पारदर्शकता आणणाऱ्या धोरणाचा एक भाग आहे. प्रवाशांनी या बदलाची नोंद घ्यावी आणि प्रवासाच्या नियोजनात ते लक्षात घ्यावे, असे आवाहन रेल्वे प्रशासनाने केले आहे.
What's Your Reaction?
