वसई-विरार : नालासोपाऱ्यात वैद्यकीय दुकानाचे आमिष दाखवून तरुणाची ३५ लाखांची फसवणूक

पालघर | ७ ऑगस्ट २०२५ :नालासोपारा (पूर्व) येथे वैद्यकीय दुकान मिळवून देण्याचे आमिष दाखवून एका तरुणाकडून ३५ लाख रुपयांची फसवणूक करण्यात आल्याची घटना उघडकीस आली आहे. पीडित प्रवीण कालूराम चौधरी (वय २१), वैद्यकीय दुकान चालवणारा तरुण असून, त्याने तुळिंज पोलीस ठाण्यात तक्रार दाखल केली आहे.

तक्रारीनुसार, आरोपी रंजीत कांताप्रसाद यादव (वय ४०), राहणार हरिद्वार हौसिंग सोसायटी, महेश पार्क, तुळिंज रोड, याने जून २०२२ मध्ये नालासोपारा (पूर्व) येथील एका नामांकित मल्टी-स्पेशालिटी रुग्णालयाजवळ दुकान भाड्याने देण्याचे आश्वासन दिले. त्यासाठी त्याने चौधरीकडून तब्बल ४० लाख रुपयांचा ‘सिक्युरिटी डिपॉझिट’ घेतला.

मात्र दोन वर्षांहून अधिक कालावधी उलटूनही संबंधित दुकान मिळाले नाही. केवळ ५ लाख रुपये परत करण्यात आले असून उर्वरित ३५ लाख रुपये परत करण्यात आलेले नाहीत, असे चौधरी यांनी तक्रारीत नमूद केले आहे. वारंवार पाठपुरावा करूनही पैसे न मिळाल्याने अखेर त्यांनी पोलीस ठाण्यात धाव घेतली.

तुळिंज पोलिसांनी ५ ऑगस्ट २०२५ रोजी दुपारी २:०१ वाजता भारतीय न्याय संहिता (BNS) कलम ३१८(४) अंतर्गत फसवणुकीचा गुन्हा नोंदवला आहे. वरिष्ठ पोलीस निरीक्षक विजय जाधव तसेच सहायक पोलीस निरीक्षक मनेश साबळे व गोविंद बस्ते या अधिकाऱ्यांच्या मार्गदर्शनाखाली तपास सुरू करण्यात आला आहे.

पोलीस सूत्रांनुसार, आरोपीने अन्य कोणाच्या सोबतही अशीच फसवणूक केली आहे का, याचा शोध घेतला जात असून उर्वरित रकमेसंदर्भात आर्थिक तपासही सुरू आहे.