खार येथील कचरा साकीनाका परिसरात टाकणाऱ्या ‘द गौरव कॅटरर्स’वर महापालिकेची कारवाई; ₹१०,००० दंड ठोठावला

मुंबई, १ ऑगस्ट २०२५: बृहन्मुंबई महानगरपालिकेने खार येथून साकीनाका येथील मिठी नदी परिसरात मोठ्या प्रमाणावर कचरा टाकणाऱ्या ‘द गौरव कॅटरर्स’ या आस्थापनावर १०,००० रुपयांचा दंड ठोठावला आहे. ही कारवाई ‘एल’ विभागाच्या पथकाने दिनांक ३१ जुलै २०२५ रोजी केली.

बृहन्मुंबई स्वच्छता आणि आरोग्य उपविधी २००६ अंतर्गत सदर आस्थापनाने स्वतःचे परिसर स्वच्छ न ठेवणे व धोकादायक कचऱ्याची अयोग्य विल्हेवाट लावल्यामुळे ही कारवाई करण्यात आली आहे.

अतिरिक्त महानगरपालिका आयुक्त (शहर) डॉ. अश्विनी जोशी यांच्या निर्देशानुसार १२ जून २०२५ पासून सुरू असलेल्या विशेष मोहीमेमध्ये आतापर्यंत सात आस्थापनांकडून एकूण ₹६५,००० इतका दंड वसूल करण्यात आला आहे.

दंडित आस्थापनांमध्ये IDFC बँक (ठाणे), अशोक टॉवर हौसिंग सोसायटी (मरोळ), HDFC बँक (विक्रोळी), टॅक्सीमॅन व सिमरन हौसिंग सोसायटी (कुर्ला), गोदावरी हौसिंग (ब्राह्मणवाडी), आणि इम्तियाज लाईन डेपो यांचा समावेश आहे.

'स्वच्छ व सुंदर मुंबई' मोहिमेअंतर्गत बृहन्मुंबई महानगरपालिका कचरा नियमांचे उल्लंघन करणाऱ्या घाऊक कचरा निर्मात्यांविरोधात कठोर कारवाई सुरूच ठेवणार आहे.