मीराभायंदरमध्ये 'किल्ला सायक्लोथॉन 2025' आयोजित, आयुक्त व अधिकाऱ्यांचा सायकलवरून सहभाग

मीराभायंदर: मीराभायंदर महानगरपालिकेने महाराष्ट्र शासनाच्या 'माझी वसुंधरा' अभियानाचा संदेश शहरभर पसरवण्यासाठी आयोजित केलेली 'किल्ला सायक्लोथॉन 2025' स्पर्धा रविवारी यशस्वीरित्या संपन्न झाली. या मोहिमेला नागरिकांनी मोठ्या प्रमाणावर प्रतिसाद दिला, तसेच आयुक्त आणि अतिरिक्त आयुक्त यांनीही सायकलवरून सहभाग नोंदवला.

ही सायकल स्पर्धा भायंदरच्या नेताजी सुभाषचंद्र बोस मैदानातून सुरू होऊन धारावी जंजिरा किल्ला मार्गे पुन्हा त्याच मैदानावर संपली. स्पर्धेचा प्रारंभ सकाळी ७ वाजता करण्यात आला, आणि यामध्ये ५०० हून अधिक सायकलप्रेमींनी सहभाग घेतला. सहभागी तीन वयोगटांमध्ये विभागले गेले होते: १८-२५, २६-५० आणि ५१-६० वयोगट.

अतिरिक्त आयुक्त डॉ. सचिन बांगर, उपायुक्त (मुख्यालय) कल्पिता पिंपळे, शहर अभियंता दिपक खांबीत, तसेच महानगरपालिका विभागप्रमुख, अधिकारी, कर्मचारी आणि पर्यावरणप्रेमी सायकलपटू यांनीही उत्साहाने सहभाग घेतला. विशेषतः आयुक्त राधाबिनोद शर्मा यांनी स्वतः सायकलवरून संपूर्ण मार्गिकेचा प्रवास करत स्पर्धकांचा आत्मविश्वास वाढवला आणि पर्यावरण संवर्धनाची संकल्पना रुजवण्याचा प्रयत्न केला.

स्पर्धेनंतर वृक्षारोपण सोहळा आयोजित करण्यात आला, जिथे उपस्थित मान्यवरांनी "झाडे लावा, झाडे जगवा" हा संदेश दिला. या अनोख्या सायक्लोथॉनमध्ये प्रत्येक सहभागीने जबाबदार नागरिक म्हणून पर्यावरण जपण्याचा संकल्प केला.

विजेत्यांना 'वसुंधरा महोत्सव 2025' च्या समारोप सोहळ्यात उत्कृष्ट दर्जाच्या सायकली प्रदान करण्यात येणार आहेत. तसेच, सर्व सहभागी स्पर्धकांना प्रमाणपत्रांचे वितरण करण्यात आले. आयुक्त राधाबिनोद शर्मा यांनी स्पर्धेतील सर्व सहभागींचे कौतुक करत त्यांच्या सहभागाबद्दल आभार व्यक्त केले.

या अभिनव उपक्रमाला मिळालेल्या उत्साही प्रतिसादामुळे प्रशासनाने नागरिकांना पुढील उपक्रमांमध्येही सक्रिय सहभाग घेण्याचे आवाहन केले आहे.