पालिकेची सलग दुसऱ्या दिवशी अनधिकृत बांधकामविरोधी धडक मोहीम!

विरार : वसई-विरार महानगरपालिकेच्या माध्यमातून सलग दुसऱ्या दिवशी अनधिकृत बांधकामविरोधी धडक कारवाई करण्यात आली. बुधवार, 18 सप्टेंबर रोजी पालिकेच्या विशेष नियोजन प्राधिकरणाने केलेल्या कारवाईत विरार-खैरपाडा गाव येथील तब्बल 7 हजार चौरस फूट औद्योगिक शेडचे बांधकाम निष्कासित करण्यात आले. तर गुरुवार, 19 सप्टेंबर रोजी प्रभाग समिती ‘डी`मधील सर्व्हे क्रमांक- 6 मधील 2 हजार चौरस फूट पत्राशेड जमीनदोस्त करण्यात आले. याशिवाय  या प्रभागातील लिंक रोड, डी मार्ट, अग्रवाल नाका, गाला नगर येथील अंदाजित 125 ते 130 अनधिकृत टपऱ्याही काढून टाकण्यात आल्या. 

वसई-विरार महापालिका आयुक्त अनिलकुमार पवार (भाप्रसे) यांच्या आदेशानुसार,वसई-विरार महापालिका क्षेत्रातील अनधिकृत बांधकामविरोधी मोहीम राबविण्यात येत आहे. त्यानुसार; अतिरिक्त आयुक्त संजय हेरवाडे व उपायुक्त अजीत मुठे यांच्या नेतृत्वात प्रभाग समिती ‘डी`मध्ये ही कारवाई करण्यात आली. या कारवाईत सहाय्यक आयुक्त मोहन संख्ये यांचाही प्रामुख्याने सहभाग राहिला. 

दरम्यान; विरार-खैरपाडा-विरार फाटा येथील कारवाई विशेष नियोजन प्राधिकरणाच्या सहाय्यक आयुक्त संगीता घाडीगावकर यांच्या नेतृत्वात करण्यात आली. या कारवाईत ठेका अभियंता हिमांशू राऊत, लिपीक हेमंत मेहेर आणि अन्य कर्मचारी सहभागी झाले होते.