मुंबईत इमारतीचा स्लॅब कोसळून तीन मजूर ठार

मुंबई:मुंबईतील दिंडोशी परिसरात आज, ५ सप्टेंबर रोजी, एक गंभीर दुर्घटना घडली. नवजीवन नावाच्या २० मजली इमारतीच्या बांधकामादरम्यान २० व्या मजल्याचा स्लॅब अचानक कोसळला, त्यामुळे तीन मजुरांचा दुर्दैवी मृत्यू झाला आहे, तर चार अन्य जखमी झाले आहेत. जखमींवर मालाडमधील देसाई रुग्णालयात उपचार सुरू आहेत.

दुर्घटना घडली त्यावेळी स्लॅब टाकण्याचे काम सुरू होते. घटनेनंतर लगेचच अग्निशमन दलाच्या गाड्या आणि पोलिसांचे पथक घटनास्थळी दाखल झाले. स्लॅब हटवण्याचे आणि इतर अडकलेल्या लोकांना बाहेर काढण्याचे काम तातडीने सुरू केले.

मुंबई महापालिकेने दिलेल्या माहितीनुसार, ही इमारत झोपडपट्टी पुनर्वसन प्रकल्पाचा भाग आहे. बांधकाम सुरू असताना ही दुर्घटना घडली. घटनास्थळावरून पोलिसांकडून तपास सुरू आहे.

मुंबईत स्लॅब कोसळण्याच्या अशा घटना यापूर्वीही घडल्या आहेत. काही महिन्यांपूर्वी नवी मुंबईतील कोपरखैराणे भागात पाच मजली इमारतीचा स्लॅब कोसळला होता, परंतु सुदैवाने त्यात जीवितहानी टळली होती. विक्रोळी येथील कैलास बिझनेस पार्कमधील इमारतीचा स्लॅब कोसळून तीन जणांचा मृत्यू झाला होता.

या घटनांमुळे मुंबईतील बांधकाम सुरक्षेच्या उपाययोजनांवर प्रश्नचिन्ह उभे राहिले आहे. बांधकाम सुरू असताना आवश्यक ती काळजी न घेतल्यास अशा दुर्घटना पुन्हा होण्याची शक्यता आहे.