होऊ देत खर्च ! उमेदवारांच्या खर्चाची मर्यादा लाखोंनी वाढली. वाचा किती लाख अधिक खर्च करता येणार.

मुंबई - निवडणुका आल्या की चर्चा होते उमेदवारांची आणि उमेदवारांची चर्चा आली की त्यांनी निवडणुकीसाठी केलेल्या खर्चाचीही चर्चा होते. उमेदवारांनी निवडणुकीसाठी करावयाच्या खर्चासाठी निवडणूक आयोगाने काही मर्यादा घातलेल्या असतात आणि या खर्चावर निवडणूक आयोगाची बारीक नजर असते. मात्र आता याच खर्चाची मर्यादा निवडणूक आयोगाने वाढवली आहे. त्यामुळे उमेदवारांना थोडा जास्तीचा खर्च निवडणुकीसाठी करता येणार आहे. निवडणूक आयोगाकडे काही पक्षांनी खर्चाच्या मर्यादेत वाढ करण्याची मागणी केली होती त्यावर निवडणूक आयोगाने महाराष्ट्र राज्यातील विधानसभा उमेदवारांसाठी खर्चाची मर्यादा वाढविली आहे.

या निर्णयामुळे यंदाच्या निवडणुकीत उमेदवारांना ४० लाख खर्च करता येणार आहे. याआधी खर्चाची मर्यादा २८ लाख इतकी होती आता त्यात आणखीन १२ लाखांची वाढ करण्यात आलेली आहे. याशिवाय अप्रत्यक्ष होणारा खर्च हा वेगळाच असतो. पक्षाकडून देखील उमेदवारासाठी खर्च केला जातो. ऐन दिवाळीत निवडणुका आल्याने प्रत्येक पक्षाकडूनच निवडणुकीसाठी विशेष खर्च करण्यात येईल. निवडून येण्यासाठी प्रत्येक उमेदवार या ना त्या कारणाने खर्च करत असतो. त्यात सणासुदीचे दिवस असले की निवडणुकीत एक वेगळीच रंगत पाहायला मिळते. यंदाच्या निवडणुकीत दिवाळीमुळे रेकॉर्ड ब्रेक खर्च राजकीय पक्षांकडून करण्यात येईल अशी शक्यता वर्तवण्यात येत आहे.