भाईंदर महापालिकेत रिक्त पदांची संख्या प्रचंड; प्रशासनावर होतोय विपरीत परिणाम

भाईंदर (वार्ताहर): मीरा-भाईंदर महानगरपालिकेतील आकृतीबंधानुसार मंजूर असलेल्या पदांच्या संख्येपैकी कार्यरत असलेल्या पदांच्या इतकीच रिक्त पदे असल्याने त्याचा विपरीत परिणाम प्रशासकीय कामावर होत आहे. तसेच कार्यरत पदांवरील कर्मचाऱ्यांवर अतिरिक्त कामाचा बोजा वाढला आहे.

महापालिकेत वर्ग १ ते ४ अशा संवर्गाच्या २५७० मंजूर पदांपैकी १२३४ पदे कार्यरत आहेत, तर १३३६ पदे रिक्त आहेत. वर्ग १ मधील रिक्त पदांमध्ये अतिरिक्त आयुक्त, उपायुक्त, वैद्यकीय अधिकारी, स्त्री रोग प्रसूती तज्ञ यांसारखी महत्त्वाची पदे रिक्त आहेत. वर्ग २ मध्ये अग्निशमन केंद्र अधिकारी, सहाय्यक आयुक्त, प्रशासकीय अधिकारी, वर्ग ३ मध्ये कनिष्ठ अभियंता, लिपिक, वाहन चालक आणि वर्ग ४ मध्ये मजूर, रखवालदार यांसारखी महत्त्वाची पदे रिक्त आहेत. यामुळे प्रशासकीय कामावर मोठा परिणाम होत आहे.

कार्यरत पदांवरील काही कर्मचार्‍यांना पदोन्नती मिळाल्यामुळे, काही कर्मचारी सेवा निवृत्त झाल्यामुळे तसेच काही कर्मचार्‍यांचे निधन झाल्यामुळे रिक्त पदांची संख्या वेळोवेळी वाढली आहे. त्याचबरोबर मीरा-भाईंदर शहराच्या वेगाने होणाऱ्या वाढीमुळे महापालिकेच्या कामातही प्रचंड वाढ झाली आहे. परिणामी, रिक्त पदांची उणीव अधिकच तीव्र होऊ लागली आहे.

तत्काल रिक्त पदे भरावीत, अशी मागणी सेवानिवृत्त प्राचार्य डॉ. सुरेश येवले यांनी केली आहे. याबाबत राज्य सरकारकडून नवीन आकृतिबंध मंजूर करण्यासाठी सविस्तर अहवाल सादर करण्याचे निर्देश महापालिकेला देण्यात आले होते. मात्र, अनेक महिने उलटूनही अद्याप अहवाल सादर केला गेलेला नाही. यामुळे, अनेक महापालिका कर्मचारी पदोन्नतीपासून वंचित राहिले आहेत.रिक्त पदांची संख्या आणि कार्यभाराच्या वाढीमुळे प्रशासनावर अधिक दबाव वाढला आहे. त्वरित उपाययोजना घेण्याची आवश्यकता आहे.