माझे घर, माझा गणपती’ उपक्रमांतर्गत ठाणे महापालिकेची शाडू मूर्ती कार्यशाळा; नागरिक व विद्यार्थ्यांचा उत्स्फूर्त प्रतिसाद

ठाणे, ३० जुलै: ठाणे महानगरपालिका आणि पर्यावरण दक्षता मंडळाच्या संयुक्त विद्यमाने पर्यावरणपूरक गणेशोत्सव साजरा करण्याच्या उद्देशाने ‘माझे घर, माझा गणपती’ या संकल्पनेअंतर्गत शाडू मातीपासून गणेश मूर्ती घडविण्याच्या कार्यशाळांचे आयोजन करण्यात आले आहे. या कार्यशाळा ठाणे शहरातील विविध ठिकाणी मोफत आयोजित करण्यात येत असून, नागरिक व विद्यार्थ्यांचा त्याला उत्स्फूर्त प्रतिसाद लाभत आहे.

या उपक्रमांतर्गत आतापर्यंत १०० हून अधिक नागरिकांनी दादोजी कोंडदेव स्टेडियमजवळील ग्रीन शॉपी कार्यालयात शाडू मातीच्या मूर्ती तयार केल्या आहेत. कार्यशाळांना अधिक प्रतिसाद मिळत असल्यामुळे त्याचे ठिकाण आणि वेळ वाढवण्यात आले असल्याचे मुख्य पर्यावरण अधिकारी मनीषा प्रधान यांनी सांगितले.

कार्यशाळांचे आयोजन खालीलप्रमाणे करण्यात आले आहे:

• दादोजी कोंडदेव स्टेडियम, गाळा क्र. १५ येथे १७ ऑगस्टपर्यंत दररोज कार्यशाळा आयोजित केली जात आहे.

• उपवन तलाव येथील अॅम्फी थिएटर येथे देखील शनिवार व रविवार कार्यशाळा घेतल्या जातील.

• महामानव शिव शाहू फुले आंबेडकर स्मृती सभागृह, पोखरण रोड नं. २ येथे २ व ३ ऑगस्ट रोजी कार्यशाळा होणार आहे.

या कार्यशाळांमध्ये सहभागी होण्यासाठी नागरिकांनी ९९२०७७२८६९ या क्रमांकावर संपर्क करून नाव नोंदणी करावी, असे आवाहन करण्यात आले आहे. सर्व कार्यशाळा विनामूल्य आहेत.

पर्यावरण शाळा उपक्रमांतर्गत ठाणे महापालिकेने विविध शाळांमध्ये शाडू मातीच्या मूर्ती तयार करण्याचे प्रात्यक्षिक सादर केले असून, ३००० हून अधिक विद्यार्थ्यांनी त्यात सहभाग नोंदवला आहे. यामध्ये ठाणे शहर, डायघर, खर्डी, दिवा, मुंब्रा, बाळकुम, मानपाडा, ओवळा येथील शाळांचा समावेश आहे. विद्यार्थ्यांमध्ये पर्यावरणपूरक सण साजरे करण्याविषयी जागृती निर्माण करण्याचा उद्देश या उपक्रमामागे आहे.

या उपक्रमाच्या पुढाकारात ठाणे महापालिकेने ४ मूर्तीकारांना मोफत जागा उपलब्ध करून दिली असून, १७ मूर्तीकारांना एकूण २५ टन शाडू माती मोफत पुरवण्यात आली आहे.

महानगरपालिका आणि पर्यावरण दक्षता मंडळाच्या या उपक्रमामुळे पर्यावरणपूरक गणेशोत्सव साजरा करण्यास मोठ्या प्रमाणावर प्रोत्साहन मिळत असून, शाडू मूर्तीच्या वापरास नागरिक आणि विद्यार्थ्यांमधून भरभरून प्रतिसाद मिळतो आहे.