गुजरात एसीबीकडून १० लाखांच्या लाचेसह मुंबई पोलीस अधिकाऱ्याला अटक

मुंबई:गुजरात एंटी-करप्शन ब्यूरोने मुंबईत मोठी कारवाई करत माटुंगा पोलीस ठाण्याचे सहाय्यक पोलीस निरीक्षक दिगंबर पगार यांना १० लाख रुपयांची लाच स्वीकारताना रंगेहाथ अटक केली. पगार यांनी राजकोट येथील सायबर गुन्ह्यातील आरोपीला अटक न करण्यासाठी ही लाच मागितल्याचा गंभीर आरोप आहे. ही कारवाई गुजरात एसीबीला मिळालेल्या तक्रारीनंतर झाली. तक्रारदाराने आरोप केला की पगार यांनी गुन्हेगाराला वाचवण्यासाठी १० लाख रुपयांची मागणी केली होती. तक्रारीवर त्वरीत कारवाई करत गुजरात एसीबीने मुंबईत पगार यांना अटक करण्यासाठी सापळा रचला आणि त्यांना लाच घेताना पकडले. या घटनेनंतर मुंबई पोलीस दलात मोठी खळबळ उडाली असून, पगार यांना तत्काळ निलंबित करण्यात आले आहे. गुजरात एसीबीची ही कारवाई भ्रष्टाचाराविरोधी लढ्यात एक महत्त्वपूर्ण पाऊल मानली जात आहे. पगार यांच्याविरुद्धची कारवाई मुंबई पोलीस दलातील इतर लाचखोर अधिकाऱ्यांसाठी धोक्याचा इशारा ठरली आहे. यामुळे भ्रष्टाचार विरोधी यंत्रणांच्या कठोरतेचा पुन्हा एकदा प्रत्यय आला आहे. सध्या पोलिस दलाने या प्रकरणाचा सखोल तपास सुरू केला आहे आणि पगार यांच्या अटकेनंतर या प्रकरणात आणखी कोणाची संलग्नता आहे का, याचा शोध घेतला जात आहे. या कारवाईमुळे इतर लाचखोर अधिकाऱ्यांमध्ये भीतीचे वातावरण निर्माण झाले असून, गुजरात एसीबीच्या या धडक कारवाईचे सर्वत्र कौतुक होत आहे.