નવી દિલ્હી,:'હીરામંડી' ફેમ બોલિવૂડ અભિનેત્રી અદિતિ રાવ હૈદરી અને 'રંગ દે બસંતી' ફેમ લોકપ્રિય અભિનેતા સિદ્ધાર્થે, તાજેતરમાં જ લગ્ન કર્યા છે. અદિતિએ, ઈન્સ્ટાગ્રામ પર લગ્નની સુંદર તસવીરો શેર કરીને તેના તમામ ચાહકોને ખુશ કરી દીધા છે. આ બંને વચ્ચે લગ્નની કોઈ ચર્ચા નહોતી. અદિતિ-સિદ્ધાર્થનો લગ્ન સમારંભ, પસંદગીના મિત્રો અને પરિવારના સભ્યોની હાજરીમાં થયો હતો.

અદિતિ-સિદ્ધાર્થના લગ્ન સમારોહનું આયોજન દક્ષિણી શૈલીમાં કરવામાં આવ્યું હતું. અભિનેત્રીએ લગ્નમાં સુંદર ગોલ્ડન કલરની સાડી પહેરી હતી. સિદ્ધાર્થે દક્ષિણની પરંપરા મુજબ સફેદ કુર્તો અને લુંગી પહેરી હતી. અદિતિએ આ તસવીરો શેર કરતા કેપ્શનમાં લખ્યું છે કે, "તમે મારા સૂર્ય, ચંદ્ર છો અને મારા માટે તમે મારા સ્ટાર છો. અભિનેત્રીની પોસ્ટ 'પ્યાર, રોશની અને જાદુ...મિસ્ટર એન્ડ મિસિસ અદુ-સીધ્ધુ'ને હાલમાં નેટીઝન્સ તેમજ કલાકારો તરફથી શુભેચ્છાઓ મળી રહી છે. આ તસવીરોમાં બંને ખૂબ જ સુંદર લાગી રહ્યા છે.

અદિતિ અને સિદ્ધાર્થ, ઘણા વર્ષોથી એકબીજાને ડેટ કરી રહ્યા હતા. અદિતિ અને સિદ્ધાર્થે 'મહાસમુદ્રમ' નામની ફિલ્મમાં સાથે કામ કર્યું હતું. આ ફિલ્મના શૂટિંગ દરમિયાન બંને એકબીજાના પ્રેમમાં પડ્યા અને રિલેશનશિપમાં બંધાઈ ગયા. 2021 થી, તેણે ક્યાંય પણ તેના સંબંધો વિશે ખુલ્લેઆમ ટિપ્પણી કરી ન હતી. પરંતુ, તેમના તમામ ચાહકોને લાગ્યું કે અદિતિ-સિદ્ધાર્થ સાથે છે. હવે આ કપલ લગ્નના બંધનમાં બંધાઈ ગયું છે.