કમાટીબાગ ઝૂમાં ગરમીથી બચાવ માટે ખાસ વ્યવસ્થા: પશુ-પંખીઓ માટે ઠંડક ભરેલું વાતાવરણ તૈયાર

વડોદરા : શહેરમાં પડતી દાહક ગરમીની અસર માનવી સિવાય પશુ-પંખીઓ પર પણ પડી રહી છે. કમાટીબાગ ખાતેના ઝૂમાં વસતા પશુ, પંખી અને સરીસૃપોને ઉનાળાની ગરમીથી સુરક્ષિત રાખવા માટે વડોદરા મ્યુનિસિપલ કોર્પોરેશન દ્વારા વિશેષ વ્યવસ્થાઓ અમલમાં મુકાઈ છે.

ઝૂમાં કુલ 1290 પશુ, પંખી અને સરીસૃપો રહેવાસ કરે છે. તેઓને ગરમીથી બચાવવા માટે પિંજરાંઓ પર સૂકા ઘાસના પુળા, ત્રાલસા વગેરે બિછાવવામાં આવ્યા છે અને દિવસમાં બે વખત પાણીનો છંટકાવ કરીને પિંજરામાં ઠંડક જાળવી રાખવામાં આવે છે.

પશુ-પંખીઓને ડિહાઇડ્રેશન ન થાય તે માટે ખાસ ડાયટ પણ અપનાવવામાં આવી છે. તેમાં શક્કરટેટી, તરબૂચ, કાકડી અને કેરી જેવી ઠંડકકારક સીઝનલ ફળો અને શાકભાજીનો સમાવેશ થાય છે. તેમજ પીવાના પાણીમાં વેટરનેરી સપ્લીમેન્ટ ઉમેરીને તેને વધુ પોષક અને સ્વાદિષ્ટ બનાવવામાં આવે છે.

હવે દરેક દિવસે ઝૂમાં 125 કિલો બરફ મંગાવવામાં આવે છે, જેને નાના ટુકડાઓમાં વિભાજિત કરીને પ્રાણીઓને આપવામાં આવે છે. બરફ ચાટીને પશુ-પંખીઓ ગરમીથી રાહત અનુભવે છે.

આ તમામ વ્યવસ્થાઓ વરસાદી સીઝન શરુ થાય ત્યાં સુધી ચાલુ રહેશે જેથી કમાટીબાગના તમામ જીવજંતુને ગરમીથી પૂરતું રક્ષણ મળી રહે.